O CASTRO DE PEDROUZOS
Din que no castro de Pedrouzos hai tres minas ou
vigas, unha de ouro, outra de prata e outra de alcatrán; como non
se sabe cal é esta, e tocarlle non se pode, pois todo canto hai
no arredor se queimaría, non se anda en busca das outras dúas
Neste castro había tamén un señor
encantado, e dunha vez pasou por alí unha muller que daba peito.O
encanto, a quen ninguén vía, chamouna para que dera
de mamar a un neniño que el tiña e levouna por unha mina
moi longa ata unha casa bonitísima. Despois que lle deu de mamar
trouxo o señor unha untura e mandoulle á muller que metera
nela os dedos e logo que lle untara os ollos ó neno. Fixoo así,
mais ela case sen dar conta pasou os dedos por un ollo seu e dende entón
vía por el coma os encantos.
Ó outro día era 27 e foi a muller
á feira das Cruces de Sobrado e polo ollo que untara viu ó
señor do castro que ninguén máis vía.
En vez de calar e de non facer caso, chamouno anque el non lle falaba.
Ende outro día a muller foi o castro e díxolle
o señor:
-¿Con que ollo me viches na feira?
Ela mostroulle con cal fora e tiroullo naquel intre..
Páxina anterior
O que sexa...