Mien Plattdüütsch leev ik, wiel't mi an't Hart wussen is
Harr'k em man slapen laaten
Vundaagen weer Walter utnahmswies maal fröher upstahn, he hett nich geern wenn ik em um ölven ut'n Bett smieten do. "Bis all upstahn?" froog ik em at ik keem, um em to besööken un he de Huusdöör open maakte. "Jo, seggt he,
"wat denkst du woll, ik bün vor vormiddaag all up Jagd wesen," "Gifft jo nich, wat hess denn jagt?" "Raadt maal" seggt Walter to mi, at wi us inn'e Stuv dahl setten deen. "Dat kann jo nich de Reiher wesen, de di de ganzen Karpen un Goldfisch ut de Kuhl fungen hett, ik weet woll dat du em all ümmer maal denn Hals umdreihn wullst." "Nä, de weert nich," antwurrt he, "Dat kunn uk nich dat Reh wesen sien, wiel't jo noch kien frischen Salat geven deiht." "Nä, dat uk nich, over ik will't di seggen, dat weer een Kateker, up denn ik dat ditmaal affsehn harr." "Woso dat denn?" nu wurd ik neeschierig.
"Jo, de lüttje Swienegel de springt doch reinweg ut'n Boom, up't Dack vun't Vagelhuus, hangt sik dar anne Siet bi dahl un frett mi dat ganze Vagelfutter up, un dat wull ik nich. Dar heff ik een Fall upstellt un em infungen. Wull em wieter wegbringen un dar woller loopen laaten. Bi usen Nabor, denn ik jo nich utstahn kann, de, de dar ganz unnen an'n Barg wohnen deiht. De olle Plünnenhändler, dar sitt dat so ruug um't Huus umto ut, dat mags nich mit ankieken." "De Kateker, de kummt woller" meent Walter's Fro, "dar kanns up an" "Nä," seggt Walter "dat glöv ik nich, ik heff em eers noch gau kennteekent." "Wor hess dat denn maakt, hess em uk noch een Halsband umleggt?" froog ik em. "Nä, Quatsch, ik heff em denn Steert anspritzt, eer ik em dar unnen ann'e Straat loopen laaten heff. Blaue Farv harr'k noch inne Garaasch." "Büst nich klook" seggt Walter's Fro, "wat schüllt de Lüüd woll denken, wenn se een Kateker hier seet mit'n blauen Steert?"
"Och " seggt Walter, "wenn he woller kummt, legg ik mi up de Luur, fang em woller un denn kriggt he uk noch een geelen Striepen övern Puckel. De Farv, de heff ik all inne Garaasch."
Trüch nah mien Heimaat Siet
