main khayaal hoon kisi aur ka, mujhe sochta koi aur hai
sar-e-aaina mera aks hai, pas-e-aaina koi aur hai

main kisi ke dast-e-talab men hoon, to kisi ke harf-e-dua men hoon
main naseeb hoon kisi aur ka, mujhe maangta koi aur hai

ajab aitebaar-o-be-aitebaar ke darmiyaan men hai zindagi
main qareeb hoon kisi aur ke, mujhe jaanta koi aur hai

tujhe dushmanon ki khabar na thi, mujhe doston ka pataa na tha
teri daastaan koi aur thi, mera waaqea koi aur hai