Ang Pagkakaugnay ng mga Pagbasa

Sa ebanghelyo ni Juan (2:13-25), nilatigo ni Jesus ang mga namamalit ng pera at pinagalitan ang mga nagtitinda ng mga kalapati. Ang mga trabahong ito ay hinihingi ng gawain sa Templo: kailangang maghandog ng sakripisyong nakalulugod sa Diyos. Kung kaya naman ang mga hayop na ihahandog ay mas magandang bilhin sa Templo dahil sa gayong paraan ay nakasisiguro na karapat-dapat sa paghahandog ang hayop na bibilhin. Upang makabili ng hayop, kailangang palitan ang pang-araw-araw na salapi sa salapi ng Templo. Ayon sa Levitico, ang mga mahihirap na hindi makabili ng malalaking hayop ay maaaring maghandog ng mas maliit na hayop. Matatandaan na para sa kanyang paglilinis, si Maria ay naghandog ng mga kalapati. Ito ay dahil sila ay mahirap lamang. Dahil sa gawaing ito, ang mga publikano at prostituta ay hindi maaaring makapag-alay sa Diyos dahil hindi tatanggapin ng mga namamalit ang kanilang salapi. Ang kanilang pera, sa mata ng mga namamalit, ay nagmula sa kasalanan at hindi katanggap-tanggap. Sa kadahilanang ito, si Jesus ay nagalit. Kahit ang Templo ay nagiging dahilan sa hindi pagkaligtas ng ilan.

Sa ginawang paglalatigo ni Jesus -- na sa tingin ng mga pinuno ng mga Judio ay maling-mali -- siya ay tinanong ng mga ito: Anong himala ang maaaari mong gawin upang patunayan na ikaw ay may karapatang gawin ang iyong ginawa? Sa taong na ito ng mga pinuno ay malinaw na nauulinigan ang ikalawang pagbasa: "Ang mga Judio ay nanghihingi ng mga tanda..."

Sa kabilang-dako, ang mga alagad na nakasaksi ng ginawa ni Jesus ay unti-unting nanampalataya sa mga salita ni Jesus. Una, ay naalala nila ang Awit 69:9 na sa Tagalog ay maaaring isalin ng: "Nag-init ang aking kalooban dahil sa pagmamalasakit para sa iyong Bahay". Ikalawa, nang maging saksi sila sa kamatayan at muling pagkabuhay ni Jesus at naalala nila ang tagpong ito, lalo silang naniwala sa mga salita ni Cristo.

Paniniwala/pagsampalataya sa mga salita ni Cristo... ang tugon sa salmo responsoryo ay: "Panginoon, nasa iyo ang mga salita ng buhay na walang hanggan". Ito ay halaw sa Juan 6:68. Ang mga salitang ito ay binigkas ni Pedro nang siya ay tanungin ni Jesus kung siya at ang kanyang mga kasama ay aalis ding tulad niyong mga na-iskandalo sa kanyang mga sinabi tungkol sa pagkain sa kanyang laman. Sa konteksto ito, ang mga salita ay deklarasyon ng patuloy na pagsama kay Jesus, sa kabila ng pagtalikod ng iba. Hindi nga ba't sinabi na ni Jesus na hindi sapat ang nakikinig sa kanyang mga salita -- dapat din itong isinasabuhay at ginagawa?

Ang kahalagahan ng pagtanggap sa mga salita ni Jesus ang kaganapan ng salaysay tungkol sa mga Mandamyento ng Panginoon sa Eso. 20. Mapapansing ipinagdidiinan sa yugtong ito ang narinig ng mga Israelita at ang kanilang takot sa Panginoon. Bakit kailangang ang takot? Upang ang kanilang pakikinig ay maging pagtalima. At kung sila'y tatalima sa mga salita ng Panginoon, pinapatunayan lamang nila na sila nga ay sa Panginoon.