SCENE 1

(街上，Dave戴著耳筒來回走動。)

D： MP3冇歌聽添… (看錶) 而家收音機應該播緊歌喇喎，聽下先。

(音樂漸進：  時光可變 世界可變 人情亦許多都變遷 友共情不變 那種真找不到缺點 

你我再次相見 隨年和月身心雖秏損 友共情從難扭轉 心內那熱暖 仍是純真未變)

(Cut music)

(人聲入)

D： 嘩，乜電台播埋D咁老土既歌架… 我真係唔明點解D人咁鍾意D講友情既歌架。友共情不變？講笑咩，世界上邊有D咁既野架。朋友呢D野，過一輪就冇架啦！ 好似小學畢業個陣時，個個寫埋D肉麻野，咩友誼永固呀，friendship forever呀咁，講就講得好聽；但係試問小學畢業之後，有幾多個重真係有聯絡架？ 一生一世既朋友喎，唔好咁天真啦。

(Dave坐下，看著往來的人們。)

(Nora，Rica，Lemon經過，開心地有說有笑)

N： 你話我地去邊度飲野好？

R： 不如去bubble star啦，近D丫嘛。

L： 我唔係好鍾意個度者，咁嘈。我地話明出黎傾計家嘛。

N： 咁…出黎飲野好少話唔嘈架喎…你有冇D咩心水地方丫？

L： 都冇架。一係周圍行下先囉，見到間鍾意既先入去都得既。

(三人離去)

(Dave起來，又再來回走動)

D： 我都唔明D人點解咁鍾意同D friend傾計既，傾完又唔可以解決問題既。話就話同你傾，幫下你，其實咪又係敷衍你。朋友都係人，佢地又幫得你幾多丫？我成日都懷疑，其實D人聽自己D friend訴苦0個陣，佢地都好唔耐煩架，但係又唔好意思講出口喎，唉…我真係登佢地可憐。

(甲和乙拿著藍球從另一邊進場)

甲：咦，Dave喎。（對乙)不如叫埋佢一齊打波咯。(對Dave) Dave！你同唔同我地一齊去打波呀？

(Dave向著另一邊走，沒回應)

甲：乜佢唔理人架… 喂！Dave！

乙：算啦，唔好理佢喇，佢好寸架，懶cool咁。

甲：唔係哩，我聽講佢打波好掂架喎，我真係想領教下。

乙：佢打波係好勁，但係佢份人勁囂囉。同佢打波好無癮架。

甲：如果佢真係咁勁既話，我唔介意佢囂呀。我點都要同佢打返場。Dave！Dave！

(Dave下台，一直沒有回望)

(甲和乙跟著下台)

(Nora，Rica，Lemon復出)

R： 而家點呀，度度你都話嘈… 冇地方去喎。

L： 我都唔知呀…我剩係想搵個地方坐低傾下計…

N： 不如唔好傾計啦，搵個地方唱下K咪重好。

L： 唔係哩，我呢排又有好多唔開心既事，想搵人傾下呀…

R： 你唔係下嘛，我地好似尋晚先傾完電話咋喎，重傾左成三、四個鐘添。你重未傾夠呀？

L： 我都唔知點解呀，但係你收左線之後，我又忽然間諗起原來我重有好多野想講…所以咪搵你地出黎諗住再傾過囉。

N： 哎呀，有咩好傾丫。有咩唔開心，因間唱歌個陣發洩哂出黎咪得囉。去唱K啦。

R： 係囉，我都贊成呀，不如去唱K算啦。

L： 咁呀，事但啦…

(Light off)

SCENE 2

(Dave 家中)

D： 其實我以前都有朋友架，重要係好friend好friend個隻添，不過嗌完一場大交之後就冇左lu… 為左個件事，我有一段時間都好唔開心架，但係而家已經諗通左lu… 其實一個人自由自在咁都幾好丫，雖然有時搵人打波係難D，之但係我得閑個陣咪打下機，睇下公仔書lor，起碼冇以前咁多唔開心。而家我又唔駛交際應酬，又唔駛理D人際關係，幾無拘無束呀。冇朋友，就唔駛成日擔心要遷就阿邊個邊個，又可以唔駛買生日禮物慳返D錢。所以話，人其實駛乜朋友丫，自己一個都得啦。

(Light off)

Scene 3

(Lemon家中)

L： 岩岩唱完K返黎，但係點解我都冇開心到既？ 我本來係想大家約出黎認認真真咁去傾下計家嘛，但係佢地又話要去唱K… 做朋友點可以成日都吃喝玩樂咁膚淺架~ 不過我同佢地傾完計之後，係未真係會開心D呢？好似尋晚咁，我同Rica都傾左成三個幾鐘啦。但係一禁低電話，咪又係得返我自己一個… 周圍重會突然變得好靜好靜，搞到我好似好孤單咁。其實初時岩岩同Nora，Rica識個陣，我覺得佢地好了解我架，我重當左佢地係知己。同佢地傾計個陣，雖然真係幫唔到我D乜野，但係起碼我會覺得有人明白我丫~ 但係而家識得耐左，我地之間好似愈黎愈少傾計咁，我重feel到我地之間開始有層隔幕添。就算傾完計，我都冇以前覺得咁開心… 既然係咁，我重要朋友黎做乜？

(Light off)

(主目錄)

  天枰貓身世        有感而發        天枰貓貓樣        貓貓狂想曲