(J坐在一張椅上，雙手不停地大力揭雜誌。B走近，手上拿著一包薯片和兩樽水。)

B：

喂！ 我本雜誌再俾你咁揭法真係會爛架！ (放下薯片和水，奪回雜誌) 你係度發咩脾氣呀？ 又同你阿媽鬧交呀？

J：

係呀... 尋晚又話我夜返喎... 我都叫左你地唔好去唱K架啦，搞到我咁夜先返屋企，而家又搞到我俾人話。我阿媽重話以後都唔俾我出街添呀！

B：

(翻看雜誌) 嘩，你而家賴哂我地啦... 尋晚唔知係邊個勁係度霸住個咪，重要唱到唔捨得走架呢？

J：

咁... 咁你知我鍾意唱歌家嘛... 喂，我有冇同你講過呀？ 其實我有諗過第時做歌手架。不過我阿爸阿媽實唔俾者。而且我都唔慌有機會啦。

B： 

又唔係咁講呀。講真丫，其實我覺得你唱歌真係得架。你知唔知呀，尋晚唱K個陣呢，你唱孫燕姿首〈遇見〉個陣我咪去左廁所既。點知我返到黎見到有兩三個人係我地個K房門口裝裝下，咁我問佢地咩事啦，原來佢地係路過，聽到你唱歌把聲超好聽，想知道係邊個唱喎。

J：

(開懷地笑) 嘩，有冇咁誇呀？ 不過呢，其實我對自己唱歌把聲都幾有信心架。我覺得如果我有機會參加D歌唱比賽既話，都好有機會羅獎。

B：

拿，做人既野呢，就唔好咁驕傲，不過我都對你好有信心既。(翻看雜誌) 咦，2005年度，第七屆華人新秀歌唱大賽？ 喂，岩哂你啦，有得諗喎。

J：

咩華人新秀歌唱大賽呀？ 未聽過既，羅黎睇下。 (奪去雜誌) 乜今年第七屆喇？ 我之前都冇聽過有D咁既野既，邊度搞架？

B: 

唔駛問緊係新時代啦，多倫多係得佢地會搞呢D節目架者。喂，你試下參加呢個比賽丫，個廣告好似話冠軍會有500蚊獎金架。

J：

(興致瞬間冷卻) 車... 得500蚊，又要拋頭露面，又要練歌，又要綵排，用咁多時間，就算羅冠軍都係得個500蚊，好唔抵者。我先唔會參加D咁既比賽呀。

B：

唔係喎，個廣告重話冠軍獎品包括一張英皇試音合約... 嘩～ 英皇喎，咁咪即係好有機會同Twins，同容祖兒佢地一間公司？ 喂，入到英皇，前途無可限量啦。

J：

(興致瞬間恢復) 英皇？ 你講真架？ (仔細地看) 咦，真係英皇喎。嘩，如果入到去就好喇。 不過... (興致瞬間冷卻) 我邊有可能羅到冠軍丫。有英皇呢張試音合約做獎品，一定會有好多勁人去參加啦。

B：

喂，乜你咁架。 頭先你重好有信心咁話如果參加比賽一定會羅獎。好喇，而家咁大個機會擺係你面前，你又縮沙。 做人點可以咁架。

J： 

即係呢個唔係縮唔縮沙既問題呀。而係... 一山還有一山高。 冇錯，我對自己把聲係好有信心，但係出面一定有好多人把聲靚過我啦。更何況我一D比賽經驗都冇，呢D咁大競爭既比賽我點同人爭呀？

B：

你唔好係度潑自己冷水啦，枉我重諗住做你頭號fans... 就算你今次比賽真係羅唔到獎咁又點喎，羅返個亞軍或者季軍都好呀。最多咪當羅D經驗lor~ 下一次你就再去羅過張合約。我就唔信英皇會咁小氣，剩係得今次送。

J：

咁又係... (興致瞬間恢復) 好啦，就參加啦～ 人總要踏出第一步既！ 咦，但係我阿爸阿媽個度點呀？我阿爸... 佢都可能俾我參加既，但係阿媽佢一定唔俾啦... (興致慢慢冷卻) 如果我去問佢既話，佢又一定會鬧我不知所謂，鬧我發埋D明星夢。唉... 我真係唔想再同佢鬧交呀。佢尋晚已經咁激氣，如果再激佢既話，話唔定佢會趕我出門口添呀。

B：

 咁冇人叫你同佢地講你要參加新秀家嘛，張報名表又唔駛家長簽名既。你咪報左名先lor，到入左圍之後你先再同佢地講。

J：

下，咁咪即係講大話？ 點得架，如果俾阿爸阿媽發現左我真係唔駛諗住返屋企呀。到時係咪你收留我先。

B：

  收留你又有乜問題丫。不過呢D就唔係叫講大話，呢D係先斬後奏唧。到你入左圍之後，你就會上電視、登報紙宣傳。到時個個都知你參賽，你又同新時代簽左約，你阿爸阿媽想你退出都唔得啦。

J：

但係... 咁樣好過份唧，好似要特登瞞住佢地去做D唔見得光既事咁... 如果俾佢地知道左既話會好大鑊架。 

B：

你唔好諗咁多啦。問心個句，你係咪真係好想做歌手先？ （J點頭) 咁咪係lor，難得有個咁好既機會擺係你面前，如果你唔好好去把握既話，遲D你就後悔架喇。

J：

你都講得岩既。好啦，衰就衰啦，參加左先算喇。話唔定我羅左個冠軍之後，可以入到英皇，成為一個出息既歌手呢。到時阿爸阿媽就唔會怪我而家所做既事架喇。阿Bi呀，咁你而家幫我填左張form先啦，我一定會努力羅個冠軍返黎俾你睇架。為左預祝成功，而家一於食哂呢包薯片！

B：

 喂，你而家要開始保養把聲，唔食得煎炸野架！ 你俾番包薯片我呀！

(Light off)

(J正坐在房中做功課，媽媽在客廳編織毛衣。電話響起，媽媽聽電話。)

媽：

喂～ Jade呀，你等陣下。 (對房) 阿J，電話呀！ (J應：哦。)  (正欲放下電話，忽然想起) 咦，點解有個男仔搵Jade既？ 唔會係男朋友掛？ 唔係喇，聽下係邊個先喇。

J：

(拿起電話) 喂，我係。 新時代？ (開始緊張) 係呀，我係參加左新秀歌唱比賽呀。 係... 係，你講真架？ 我真係入左圍？ 呀～ 好開心呀～ 係，後日下晝五點去新時代個度綵排。 星期日總決賽就會係城市廣場。 係，係，我知道架喇。好，唔該哂你。 唔，bye bye。 (放低電話，興奮地)  嘩～ 我真係入左圍呀！ 哎呀，要話俾阿B聽先得。嘩，就黎有機會羅到張英皇試音合約喇！ Yes！ 呀，好開心呀。 哈哈。我要努力，向住樂壇進發！ (坐下，PowerPoint shows family picture) 係喎，我重要同阿爸阿媽佢地講。 點開口好呢... 又要解釋點解我之前冇同佢地講，又要令到佢地肯俾我繼續參加決賽... 都係等阿爸返黎同阿爸講左先喇，之後再等阿爸幫我同阿媽解釋。 好啦，一於咁話啦。 哎呀，而家真係好興奮呀，去羅杯水飲先。

(J一走出房間，料不到媽媽就在門口)

媽：

你幾時學得咁偷偷摸摸架？ 連參加呢D咁既比賽都唔同我地講？ 你估你可以瞞得住我地咩？

J：

我... 我本來係諗住等我入左決賽先同你地講既－

媽：

即係想黎一招先斬後奏咁話啦。 呢D咁既野你係邊度學返黎架？ 之前係邊個車你去參賽架？ 你又冇車，又唔識搭巴士，一定係有人幫你你先可以瞞得住我地架者。

J：

之前... 係阿B lor...

媽：

原來係佢呀，唔怪得之啦，一定係佢教壞哂你，教你講大話架啦。 你以後唔好再同呢D人玩呀，佢盞令到你愈黎愈壞架咋。

J：

(有點發怒，但因為不對在先，所以不敢發脾氣) 你唔好咁樣話我D朋友得唔得呀？ 佢都係想幫我即。 我之前瞞住你地係我唔岩，但係我真係好想去參加呢個比賽架。 不過我又驚你地會唔俾我參賽喎，所以我咪諗住入左決賽先同你地講lor。

媽：

你覺得如果我地最初唔俾你參加比賽既話，你入左決賽之後我地就會俾你參加喇咩？ 我話你知呀，就算你而家入左決賽，我都一樣唔會俾你繼續去比賽架！

J：

(震驚) 咩話，但係我已經應承左會去比賽喇喎，況且人地已經安排好哂我要綵排、比賽個D野，我唔可以就咁退出架。

媽：

你估人地咁大間公司冇左你一個唔得呀？ 人地有大把參賽者呀，多你一個唔多，少你一個唔少。況且你而家又未同人地正式簽約，就算而家退出我地都唔會有D咩損失架。總之一句講哂，我係絕對唔會俾你繼續去參加D咩新秀既。你而家最重要就係讀好D書，為下年入大學做準備。參加埋D新秀、發埋D明星夢，對你一D幫助都冇，盞蹝時間。

J：

(發怒) 乜你咁唔講道理架，你知唔知我好難先入到決賽架？ 你知唔知我要打低幾多個參賽者呀？ 況且參加比賽唔一定會影響功課架，我都係每一個禮拜用兩三個鐘黎綵排者。我已經期待左呢D機會好耐架喇，我絕對唔會就咁放棄架。

媽：

而家係邊個對我唔誠實，邊個對我唔講道理先呀？ 當初係你自己覺得我地唔會俾你參加比賽家嘛，咁我而家咪唔俾你參加lor。 我話你知丫，呢D比賽係用黎搞噱頭架咋，你估你贏左之後真係可以入娛樂圈呀？ 真係可以做歌星呀？ 呢個世界唔係咁簡單架。 你地D細路女唔好咁天真先得架。

J：

我根本就冇話過想入娛樂圈，我只不過係想證實下自己實力者。係，我係想做歌手，但係唔代表我就唔會俾心機讀書架。總之我一定唔會放棄呢個咁難得既機會，我唔會俾自己將來後悔既。

媽：

好，你而家即係點都唔會聽我講架啦。你去參加lor， 你係夠膽去比賽既你以後就唔好再俾我見到你。我唔想有一個掛住發明星夢，係出面拋頭露面既女呀。

J：

(有點猶疑，然後下定決心) 好！ 我而家就搬出去。我係點都唔會放棄參加比賽架。

(J拿 出手提袋收拾)

媽：

好丫，你走lor，你走左以後唔好再返黎添呀，你唔好後悔呀。

(J提著一個手提袋，氣沖沖的走)

J：

我以後都唔會再返黎架喇，我會證明俾你地睇，你地唔俾我參加比賽呢個決定係錯既。

(J走)

(Light off)