HEIMLICHPHEISS
Biographie:
“even when things get mad, a man must still have his breakfast“, au zmizt im Herz vo de Schlacht muess mer sich chöne zruggläne. Oder wie de mec2rue säge wür: “s’Läbe isch so liecht wies der sälber machsch“.
Ganz im Sinn vo dene Binsewarheite isch Heimlichpheiss sit guet 3 Jahr i derä Formation am rocke: Dodo, Tegz, ämgee - vocals, mec2rue – beats&scratches.
Vorher hätt de Dodo zämä mit em mec2rue bereits d’Partysääl zum choche bracht. de ämgee und de Tegz händ di guete Vibratione vo de Gruppe gschpürt, und sind, au scho sit längerem mit em Herz bim Hip Hop, id Gruppe uufgno worde. Das heisst es hätt e neugründig ge: uf em Zürisee-Wiischiff isch im Oktober 96 s’Chind gebore und mit em Name “sächs2drittel“ gsegnet worde. Grad vo Aafang a hätt d’Gruppe einige Zerrisprobe müese d’Schtirn zeige: de Dodo isch einehalb Jahr uf Afrika, dur di unerwartet langi Absenz vom Rastaman sind di sesshafte Drü anen kritische Punkt glangt: “Sölled mer e eiges Projekt lanciere oder unbestimmti Ziit abwarte und 6 2/3 iigfrüre?“ d’liebi zum hip hop hätt d’antwort ge; nacht für nacht hät mer im cheller vom verschollene produziert und teggschtet, me hätt i allne Pünkt Fortschritt gmacht. Wo de Dodo dänn zruggcho isch, hätt mer zämä wiitergmacht, au er hätt uf sine Reise reimtechnischi Fortschritt gmacht.
Churz druf im Juni 99, isch d’Platte “Schtrassefäger“ uufgno worde, als s’Endi vonere ekstasemässige Reim - und Recordsession. doch bim Erschiinigsdatum isch de Dodo scho uf de Insle ghängt. Jetzt gseets dänn us, als das mer ändli d’Ziit händ, ois hundertprotzentig als Gruppe z’bewege. De Dodo hätt kei noii Projekt, de ämgee und de Tegz kei Maturstress... es zitteret und rockt und bebt, Konzert sind aagseit, Tracks mit voller zfrideheit gmacht... wie gseit, es rockt.