Tarıqe niya nişan dêne;15-11-1937
Ca;Xarpıt
Waxt; Nemê şewe
Çekuyê zernınê ke kewtêne tarıqa ma;MIN EBE DI RUTİYE U ZUREKERİYA
ŞIMA BEŞE NÊKERD,NO MI RA Bİ DERD,HAMA MI VERBA ŞIMA DE VILE ÇEWT
NÊKERD,NO Kİ ŞIMA RA BIBO DERD'
Wayirê nê çekuyan; Seyid Rıza
Heya Seyidê mı....
Herdişa to,tariyê şewanê Xarpıti de,zê usarê de gewr bi.Bal u
bejna to,reng be reng koyanê Dêrsımi de neqışiya bi.Kılami a şewe,seba
to mıqamanê xo de herediya,vengi hêrsın bi.Kamiya ma,hard lerzna a
şewe.Hard o dewrêş,bibi lete,kewt bi bınê bêkesiye no Xarpıt de.
Xarpıt...ax xarpıt,ez şaş bena ke tı se bêveng menda Seyidê mı
ra.Firarê kamiya ma,destan de mawzer,dormê çemê Muzıri de,derê Laçi
de,rayan kılm kerdêne hata lêlê sodıri.Her sodır tarıqa ma de,pelê
de sur gınêne hard.Domani neqeban de,vengê to ra gêrênê.
Rayan de baya goni,dewan de muj u duman.Vêyvê mar u mılawınan,verg u
heşan dest kerd bi pıro.Golê Xızıri,kemeranê xo de şerm kerd,vengê
berbayena derguşan ra mend bi zımê Dêrsımi.
Kêneki azebtiyanê xo est xoriyanê awan.Kıla adırê weşayê Xozati,
verba azmên biyêne bari.Her ca,bınê paniyanê mıxenetiye de
bi.Mıxenetiye mabênê ma de mecal u fırsend nêdiyêne,dısmen rehet
kewtêne bıne.
Seyidê mı,
Çımê dışmenan a şewa tariye,Xarpıt de bi.Merdiye u namerdiye,sareberziye
u vıleçewtiye xarpıt de bi.Zurekeriye u rastiye,inkariye u kamiya
ma,manquliye u xırabiye,serkewtene u bınkewtene xarpıt de bi.
A ca de,tarıqa taritiye u roştiye,biyene u çinibiyene.....
A ca de ebe namê ma tı,ebe namê inan Atatırk,Alpdoxan u Celal
Bayar.Atatırk istasyon de,trêne de bi.Goşê Alpdoxani,mızgina
vıleçewtiye u dexaletê to de bi.
Dınya bextê ma ra lal u ker bi.To u Celal bayari, amêyi ru be ru.Tı
zerê dês u demiran de biya.Hermê to gırêdaye bi.Çar hawir u dormê to,ebe
mawzer u eskerena amebi gırotene.Dışmen qat be qat to de zê de
bi.Celal Bayar,duruşmê jihatiya to de tersa.tewer de,bêvengiya şewe
de,hevalê to amêne dardekerdene.
Celal Bayar,xo da verê penceri ke,Tı inan mevênê.O to de tersa.Dest
u zerê êy lerca.Vengê to zelal bi.İnan ebe ters, to ard meydan.Çımê
to ke gına lak u dare ra,to reyna ebe durışmê de merdiye inan
tersna.Tı be xo verba dar a ixdame şiya.Vengê lınganê to de,taritiye
u bêvengiya şewe dıriya.To be xo veciya serê kursi.To qaytê dormê xo
kerd.Celad,esker u Celal bayar,pılêsiya bi tariyê şewe.Şuka xarpıti,mıxenetiye
de bê çare bi.Ecêbiyê de gırse ruyê şuka Xarpıti de araq o siya
rışnêne bınê lınganê to.
Mêydan serd bi.Zerê to seba welati germ bi.Têyrê çımsuri fır dêne
zerê to de.Rêça vengê to, ebe xoritiye vıla biyêne.Şuke, şewe ,koyi,
kamiya ma, asparê tarıqe, vengê to ra mend bi.Hazar mıqami veciya
vengê to de.Dışmenê dormê to, ecêbiye u şaşiye de mend.İnan a waxt
fam kerd ke,tı SEYİD RIZA wa.A ca de,ebe vengê to,domanê tarıqa ma
saya durışme u jihatiya to de, sareberz bi.To ma nêkerd şermayene.To
dışmenanê ma, a ca de ebe qehremaniya xo kerd rezil. Merdiya to,qehremaniya
to,ruhê ma kerd reng be reng.To zınginiye vıla kerd meydanê Xarpıti
de.
Heya Seyidê mı...to naye va;
'Mı ebe zurekeriye u dı rutiya şıma beşe nêkerd,no mı ra bi derd,hama
mı ki verba şıma wıle çewt nêkerd,no ki şıma ra bıbo derd'.
No heni inan ra bi derd ke,Celal Bayari be xo tometa xo eşkere kerd
duşta to de.Êy be xo na qehremaniye u goniserdıniya to nusna.
Tı rehet be seyidê mı,ruhê to reng dano tarıqa ma....
Dawa ma,ebe qehremaniya to raver şono seyidê mı.Tı çıla welatiya
seyidê mı.Ma,ebe roştiya na çıla ke to de emanet gırota,hata
serkewtene,hata serbestiye benime,xem meke seyidê mı.Mezela to de,nişanê
serbestiye neqış kenime seyidê mı...
İlhami sertkaya
14-11-2005