History of Chau Chau
 |
 |
 |
|
|||
|
|
|
臭小學Childish Primary |
|
 |
 |
|
|
|
 |
|||||
簡介
Introduction
臭臭生於廿多年前的士塔該(即香港的屎塔蓋)的某一天朝早。還記得當時天色初明，山峰間泛起魚肚白色。可是突然間變得陰暗，佈滿黑雲，大有風雨欲來之勢。就在電光火石之間，天上打了一個雷，閃了一個電：∼龍∼彭！接著溝渠中傳來「咚」的一聲，臭臭就是這樣出世了。「臭臭寶，臭臭豬，你好得意呀，十足十雪糕呀！記得大個唔好做死蠢，唔好懶醒，要叻，要出人頭地呀！
」正當臭媽媽想把臭臭一擁入懷，來個親吻之際，因天面路滑，手像塗了油一般，一不小心，臭臭就如一隻泥鰍般從臭媽媽的手中溜掉到地上。就在這瞬間，一群瞎了眼的路人甲乙丙行過，把軟弱無力剛出世的臭臭，踏個稀巴爛，成個糍餅。經過這幾踏，臭臭變成現在的身體，變成了現在的智商，而臭臭的人生，亦都可能因此改寫了。之後臭臭進了臭稚園，畢業；進了臭小學，畢業；進了臭中學，畢業；進了臭大學，畢業；一直到現在。當然其中發生了不少事，有興趣了解臭臭多些，可留意以下章節。至於臭未來...未來就會知！
出世紙
Birth Certificate
|
香港特別行政區政府 Hong Kong Special Administrator Region Government 生死註冊處 Birth and Death Registration Department 出生證明書 Birth Certificate ~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
|
||||||||||||||||||||||||||||||||||||||||||||||||||||||||||||||||
臭稚園
Kindergarten
話說變成糍餅的臭臭一日一日長大，亦都到了入讀讀稚園的時候。臭媽媽當然緊張臭臭的前途，所以臭媽媽決定幫臭臭報讀溝渠臭臭幼稚園。究竟點解臭媽媽要報這間幼稚園呢？其實原因有三：第一．溝渠臭臭幼稚園是攪聾塘區出名的幼稚園，入讀的學生非富則貴，臭媽媽當然希望自己的仔識多些這樣的同學仔喇，沾下光嘛；第二．溝渠臭臭幼稚園師資優良，每位老師都有過人的本領，例如透視眼、隔牆耳、彈弓手、飛毛腿、高Ｂ腦等，只要臭臭能學懂其中的百分之一，包保能獨步江湖；第三，因為一個「近」字。就係這些原因，臭媽媽就係幼稚園門口好辛苦排了三日三夜隊拿取報名表，亦都好辛苦排了７２小時隊交報名表。正所謂皇天不負臭心人，臭臭亦都好順利入讀溝渠臭臭幼稚園。
各位有興趣的讀者，千祈唔好以為臭臭入了溝渠臭臭幼稚園之後就一帆風順，萬事如意。臭臭在幼稚園內其實經歷了很多風雨，熬過了不少辛酸，面對無數的冷嘲熱諷。歸根究底，不多不少和臭臭的外形和口音有關。大家還記得臭臭初出世時是那麼的玉樹臨風、風流倜儻、才貌雙全，可愛非常。但慘經路人甲乙丙踐踏過體無完膚之後，外表就不用多提了。每逢同班同學上堂舉手，臭臭的心跳自然加速。為什麼呢？如果那同學舉手「柯薯薯」還好，如果「柯臭臭」就大件事，全班同學一定立刻轉頭望向臭臭，接著全班就會大叫「柯你呀，臭臭！呵呵呵註１！」。臭臭就會立刻感到無地自容，恨不得立刻捐落沆渠。真係好不容易才度過三個寒暑。至於臭臭的士塔該口音亦鬧出不少笑話。大家要明白士塔該話同廣東話唔係好似，而臭臭成家都講士塔該話。所以除了學校外，基本上無接觸廣東話。例如：狗狗→攪攪、電視機→電視雞、白切雞→白切低、老師→老Ｄ等等，最離譜就係將超級市場讀成「吳註２郎註３伍郎」。至於甚麼透視眼、隔牆耳、彈弓手、飛毛腿、高Ｂ腦等，又真係俾臭臭係畢業之前學到百分之一，變成射璃眼、撞聾耳、抽筋手、甩毛腿、低Ｂ腦，都咪話唔犀利！
註１：要高八度。
註２，３：廣東話的第一聲，即ＮＧ和ＬＯＮＧ。
臭小學
Childish Primary
經過三年每逢有同學「柯臭臭」都被人盯著奚落的幼稚園生活之後，臭臭亦都到了升讀小學的時候。不過今次臭媽媽唔使經歷再排三日三夜隊拿取報名表再加７２小時交表兼同班師奶逼餐死的滋味，因為溝渠臭臭幼稚園有「一條蟲計畫」，可以直升溝渠臭臭小學。溝渠臭臭小學每年都設有四班一年級，而其中大約兩班同學是由溝渠臭臭幼稚園直升上來，當然會重新編班；其餘學額則從校外招生。四班一年級每班都有唔同的名，分別係一花班、一開班、一富班和一貴班，取其「花開富貴」，而臭臭就被編入一富班。一富班中大部分同學都是校外生，無幾多人識得臭臭，取笑過臭臭，所以當臭臭在暑假末知道後都有丁點兒放心。就在開學前的幾日，學校為所有一年級生舉辦了新生訓練日，目的旨在讓新同學早日認識校園，認識學校的規矩；另一方面，臭臭的小學惡夢，亦從那天開始．．．
「衰臭懶臭死臭臭！你好起身！你再唔起身就遲到呀！」臭媽媽一早就發火叫。
「．．．咩事呀，臭咪註１．．．做咩叫醒我呀．．．」臭臭半夢半醒，個口吹緊口水泡說。
「衰臭懶臭死臭臭！今日係新生訓練呀！知唔知宜家幾點，八點三喇，人地八點半開始！你好同我即－刻－起－身！」臭媽媽更加大聲叫，幾乎天台都聽到。
臭臭當堂醒一醒，腦中突然一閃。「弊傢伙！點解唔一早叫醒我呀．．．死喇死喇，遲到喇！」臭臭立刻以九秒九的速度衝入廁所，以廿秒三四的速度刷臭牙洗臉梳臭頭，再以十七秒正的速度換上校服，接著用了破屋企紀錄的四十秒六五食完個早餐。前後用了一分廿七秒八九就出了門口，犀利。雖然到學校的路程只須十分鐘，可惜今天臭臭係註定黑仔。首先，平時只用等一陣的升降機，今天好似隻蟻爬下爬下，
爬極都未到臭臭住個層廿一樓，等了三分廿二秒五六都還未向上走。臭臭開始焦急，心中盤算著應該立刻跑樓梯還是繼續等，這樣又用了三秒零六。當臭臭決定行樓梯的時候，電梯傳來「叮」的一聲，電梯終於到達廿一樓，臭臭惟有立刻折返。不過福無重至，禍不單行，原本短短數十秒的電梯程，卻因為每層倒垃圾，用了兩分半鐘，臭臭都不禁暗嘆了一聲「倒楣！」。
時間一分一秒過去，臭臭已經用了七分廿二秒五一，只餘下七分三七秒四九，都幾弊！臭臭立刻使出幼稚園到的其中三種絕技：射璃眼，甩毛腿和低Ｂ腦。臭臭立刻兩眼向外斜視，爭取最闊的視野，以求避開街邊的賣菜婆、金魚佬、師奶陳李張黃和路人甲乙丙（本應仇人見面，份外眼紅，不過臭臭唔認得，出世時太細個嘛）；跟著運用低Ｂ腦分析跑回學校的最短路徑；最後再以甩毛腿跑回學校。可惜正當還有一個街口到學校時，突然在街角轉出一個刀巴茂。臭臭的射璃眼望唔切，低Ｂ腦實在轉唔切，甩無腿又停唔切，結果同個刀巴茂碰個正著，臭臭的東西跌到周地都係。「死仔包，行路唔帶眼撞倒阿叔！你邊到呀！你對眼一定生係屁股到！」正當戇直天真的臭臭想答溝渠臭臭小學的時候，刀巴茂又話：「哼！我大人不記小人過，更加唔會記你呢個怪胎過！」刀巴茂個兇神惡煞樣，真的把臭臭嚇個屎尿真流。好不容易定過神來看看手錶，已經八時廿九分四四秒。臭臭只好把他的小宇宙發揮到極限，以最快的速度回學校。
甫進入校門，臭臭已經聽到學校廣播系統傳來：「一富班賴臭臭同學，一富班賴臭臭同學，請到禮堂前排隊點名。」臭臭這時已經上氣唔接下氣，還被人全校通緝，心就更加急了。於是立刻向禮堂跑去，還邊跑邊說：「一富．．．臭臭．．．到．．．」當時全個禮堂的同學都排好隊，肅靜立正地等老師點名，卻突然聽到一個校服不整，頭髮蓬鬆，樣貌奇特的人中大叫「一褲臭臭」，所有人包括老師同學都哄堂大笑，而這個「一褲臭臭」的新花名，亦跟足臭臭六年。
當然臭臭在背負著這「一褲臭臭」的新花名的同時，亦結交了他一生之中的第一個朋友（敵人）－吳美麗同學。點解又係朋友又係敵人呢？因為他們是一對做了六年同班同學的歡喜冤家，他們每每為了小事而成日鬥咀鬥親飽。例如在二年級二發班註２時曾經發生過：「醜醜註３同學，妳『豬』唔『豬』到十萬係幾多？估妳都唔『豬』喇！」臭臭懶醒問吳美麗。吳美麗跟著又懶醒話：「咩『豬』唔『豬』呀，係『知』唔『知』，知無！死蠢！低『qua』註４！死臭爛臭！你邊處鄉下呀？」臭臭輕佻不屑話：「唔『豬』就唔『豬』喇，扮晒識，仲問人邊『暑』鄉下，死妹釘！等我教叻妳，九萬之後咪十萬囉，呵呵呵註５！」吳美麗又忍唔住話：「都話係『知』唔係『豬』，係『處』唔係『暑』呀！死臭臭！」結果，當然係一人一句「死臭臭」，「死醜醜」鬥落去鬥足一日。無聊！
註１：臭咪係臭臭對臭媽媽的叫法。
註２：二年級是用恭喜發財分班，即二恭，二喜，二發和二財班。
註３：吳美麗同唔美麗同音，即係醜，所以花名醜醜
註４：低『qua』即低qualification，意指低學歷，無知識。
註５：又要高八度。
臭中學
Joyful Secondary
正所謂光陰似箭，日月如梭。六年的被人捉弄、嘲笑，和同醜醜鬧氣的小學生活，真的轉眼就過去。亦都到了分道揚鑣，各散東西的時候。吳美麗同學是一名高材生，基本上每年考試的頭三名都有她的份兒。溝渠臭臭小學當然不會埋沒這種天才，推薦吳美麗同學報考半山區的麥當勞叔叔麥旋風漢堡包男女紀念中學，或簡稱為麥風包中學。麥風包中學是一所英文中學，每年會考高考加埋都有幾百個狀元。不過以醜醜的成績品行，她自然能如願以常，考到入去喇。所以放榜對醜醜來講，只不過是一件例行公事，沒甚驚喜。至於臭臭就無醜醜般好彩，臭臭的成績一向都只是中規中矩，不是很好亦不是很差，可能同臭臭細個的不幸踐踏事件有關連。無論如何，當然沒有獲得學校推薦，唯有靠運氣了。臭媽媽休息了九年，亦發覺係時候重出江湖，為個仔獲間好學校，詳情暫且不提。
話說到了放榜那天，臭臭成家一早番到學校等放榜。到了上午八時正，臭臭班主任金老師派發派位證，一個到一個。金老師說：「賴臭臭同學，你派得唔係好好，你同你家長相量下喇。」臭臭聽見了，當堂打了個冷震，心想：「今次慘喇．．．實被臭咪鬧．．．」接過派位證一看，果然派得非常差，係攪聾塘區最出名差的肯得雞家鄉基巴辣臭雞翼書院，陰功！就在這時，金老師又話：「我地一齊恭喜吳美麗同學去到麥風包中學！恭喜！」臭臭聽到後心裏十分之不好受，幾乎想開口同醜醜又鬥過咀，不過最終都忍唔住說：「都唔知麥風包有幾好，聽講個到的學生要學麥當勞叔叔戴個鬈毛假髮番學，到時實襯妳喇醜醜同學，呵呵呵！」醜醜當然又忍唔住對臭臭話：「點都好過人地派了去邊處呀，哼！」臭臭又跟住話：「咩邊『暑』呀，係肯得雞家鄉基巴辣臭雞翼書院呀，我哼！」醜醜立刻反駁：「據聞肯得雞家鄉基要黏鬚番學呀，學肯得雞上將嘛，都幾襯你呀，哈哈哈！」金老師呢個時候開始發火：「好即刻同我收聲！」結果臭臭同醜醜咀藐藐地互相怒視。解散時，臭臭當然第一時間衝落禮堂找臭咪喇，臭咪知道後居然無鬧臭臭，仲同臭臭講：「阿仔，你看我幾醒，我一早都估到你個衰臭臭派位唔慌派得好，所以我尋晚特登打俾阿三叔公個表姨甥個七姑丈個大表哥個細女個八舅婆個老公個姪仔呀，即係親戚喇，原來係麥風包到做校工呀，我已經叫他幫你報定名，所以唔使擔心，呵呵呵！」當臭臭仲計緊即係咩親戚的時候，臭媽媽就不耐煩話：「衰臭，仲唔行快兩步就真係無書你讀呀！」
以臭媽媽的唔知邊個親戚的關係，臭臭終於入讀麥風包中學。醜醜後來都知道呢個消息當然激到紮紮跳，至於麥風包中學係咪真係要學麥當勞叔叔戴假髮番學，稍為有智慧的都知梗係要喇，如果唔係邊叫做麥當勞叔叔麥旋風漢堡包男女紀念中學，不過就唔使日日戴，而係每逢過時過節先要。臭臭入讀麥風包中學，仍然被編到同吳美麗一班，真係好一對歡喜冤家。臭臭同醜醜係中學裏面都識到不少的新朋友，其中最特別的幾個係在中三那年的羅泥瓊、宋失靈、茹廁肥同吳六奀。羅泥瓊係一個愛美的人，因為她眼角頗高，通常陪她買東西她都看不上眼，成日話ＮＯ，所以被稱為ＮＯ姐姐；宋失靈就人如其名，成人失靈，特別個腦，上親堂都發白日夢俾老師罰，所以花名叫夢夢；茹廁肥則是另一高材生，讀書成績唔錯，喜愛綠色，鍾情各種形狀的葉葉，因身材略肥，同學多以肥肥相稱；至於吳六奀，因家中排行第六，出世時身材瘦削，所以名叫六奀，志願為油漆工人，花名五六七。臭臭與醜醜，和此四人經常形影不離，互相鬥氣，所以合稱為「麥記六妖」。
話說去到中三尾的暑假，「麥記六妖」約了出來，在大快樂餐廳商量暑假的節目。臭臭搶先問：「喂，大家呢個暑假去邊到好呀？不如去燒炭食，呀，唔係唔係，係燒野食。」五六七第一時間說：「收聲喇，唔識野係到亂吠，讀多廿年書先喇。」肥肥又跟住話：「咪係咪係，懶醒！」醜醜一面不屑講：「我都廢事睬個件臭臭，不如去宿營，又可以燒野食，又可以玩通宵。」臭臭暗地裏說：「懶巴閉，跟人半啖口水尾．．．」ＮＯ姐姐這時說：「呢個提議都幾好，醜醜係幾叻，不過去邊到宿營呀？兩日一夜。夢夢，妳有無意見呀？．．．夢夢，喂，夢夢！」夢夢好似如夢初醒話：「你地係到講緊咩呀．．．，咩宿營，咩讀多廿年書呀，好似讀多幾年就畢得業。」肥肥就話：「妳個夢夢又係到發夢，我地係到相量緊去邊到宿營呀，唉，同妳講得野多都短幾年命。」夢夢話：「咩呀．．．哦，原來講緊去邊到宿野，不如去長州的雞啼小築，聽講個到幾出名。」ＮＯ姐姐一聽到就話：「ＮＯ，唔好唔好。夢夢，妳知唔知個到點解出名？因為好多人係個到．．．講起都驚驚地。」夢夢就說：「咩呀，我覺得幾好呀，幾刺激呀。」肥肥又話：「係喇係喇，唔緊要喇。」醜醜接著話：「唔，我地六個一齊去都唔使驚喇，就這樣決定喇。」正當臭臭又想開口的時候，其餘五妖就瞪大隻眼望住臭臭講：「呢到無你事，收聲喇！」臭臭惟有伸一伸舌頭，心想：「哼！臭男不與女鬥！」。
到了宿營的朝早，「麥記六妖」相約上午十時在中環碼頭集合。夢夢居然係最早到的一個，跟著是醜醜，ＮＯ姐姐，肥肥同五六七跟住一齊到，最遲梗係臭臭喇。當臭臭到達的時候，雖然只是遲了五分半鐘，但其餘五妖已經破口大罵，甚麼「你有無搞錯！」、「你個腦生係邊到！」、「點解攪到遲到！」，「無用，唔跌落坑渠沖走真好彩！」等一次過向住臭臭爆出，攪到原本仲係未醒的臭臭都當堂醒神。臭臭梗係向其餘五妖解釋喇：「我都唔想，首先又係妳地叫我買呢樣買個樣，一個話要西瓜味汽水，一個話要甜酸蝦條，一個又話要勁辣橡皮糖，淨係今朝去『吳郎伍郎』買齊都遲晒喇，仲要帶住這些趕來，唔遲都變遲喇。」其餘五妖又繼續再話：「總之係你錯！」、「解釋即係掩飾！」、「遲就係遲！」等等。都還未鬥完，五妖已經掉轉頭上船，剩低幾廿袋東西俾臭臭，真慘！
去到長洲，一行六妖第一件事當然去雞啼小築取屋先喇。原來臭臭他們訂的屋係背山面海，日頭時又真係風景優美，心曠神怡，不過一到夜晚，自然就漆黑一片，只看見無數樹影，只聽見沙沙浪聲。話說他們放低行李
未完，待續．．．，笑料百出，勿切期待，
臭大學
University Life
待續...
臭未來
Future, who knows?
待續...
烏龜
Wu Kwai 1 9XX-X-X