(J家light off，餐廳light on。爸爸神色莊重地坐著，J坐在對面低著頭，害怕又有點沮喪。)

爸：   

你可唔可以話我知，點解你唔肯返屋企？ (J低頭不語) 你應該知道我同你媽咪呢幾日都好擔心你…  或者我地係溝通上面真係有D問題，但係你無端端走左出黎，如果有D意外，你話我同你媽咪會幾傷心丫？

J：      

媽咪根本就唔在乎… 個日係佢話以後都唔想再見到我既… 咁既然佢唔想見到我，我咪走囉。就算我有D咩事，佢都唔會理架啦！

爸：   

唉… 其實你應該知道你媽咪係口是心非架。佢好關心你，只不過係唔識點表達者。你知唔知你走左之後個兩日，你媽咪佢一聽到電話就緊張到乜咁，而且重一秒都唔肯離開個電話，驚你打番屋企冇人聽…

(J家light on，餐廳light off。媽媽坐在電話旁，垂頭喪氣。忽然電話響，媽媽彈起趕緊接聽。)

媽：   

(緊張) 喂！ 係咪阿J呀？ (失望) 喔… 爹地呀？ 點呀，學校有冇阿J既消息呀？ 佢冇返過學呀… 咁你有冇去過個個咩阿B 屋企搵呀？ 我記得佢個日提過一個叫阿B 既人架。哦，你見過佢？ 佢點講呀？ 阿J 冇去過佢屋企？ 咁點算呀？ 佢會去左邊呀？ (有點想哭) 佢會唔會俾人捉左去架？ 抑或俾人呃左去？ 你叫我點可以唔擔心喎… 哦… 好丫好丫，咁你返黎先啦，我地再打電話去佢D friend度問啦… 唔… 唔… bye bye…

(J家light off，餐廳light on。)

J：      

我冇去過阿B屋企？ 阿B根本就講大話！ 我個日一走就去左佢屋企喇。 點知佢剩係得個講字，又話會收留我。我一話佢知我離家出走咋嘛，佢就即刻搵籍口黎趕我走喇！ 好彩後尾我搵到阿恩收留我咋… 呢D咁既人，咁唔講義氣，真係枉我識錯左佢呀。

爸： 

(有點生氣) Jade，係你話人之前，你諗下你自己有冇做錯度先？你離家出走又岩唔岩呢？ 如果佢收留你，佢就係包庇緊你啦。況且人地冇趕你走呀，係人地勸你番屋企，你唔想聽，就自己走左去咋… 重有你有冇站係阿B既立場諗過呀？ 如果你係佢屋企發生左D咩事，佢點同我地交代呀？其實你個朋友冇錯架。

J：      

 (很少見到爸爸發怒，有點害怕) 咁… 當係我怪錯左佢囉… 但係當初又係佢叫我去參加比賽既… 係呢，爹地你係點知我會係阿恩屋企架？ 你地應該唔識佢架喎。 我平時都好少係你地面前提起佢既。

爸：   

其實我同你媽咪係星期五個晚已經知道你同阿恩一齊架喇。 因為個晚你有個同學打電話黎搵你，佢同我地講話阿恩會去接你，我地咪估到你可能去左阿恩屋企囉。

(J家light on，餐廳light off。電話響，媽媽趕緊接聽。)

媽：   

喂，Jade－ 哦，你搵Jade呀？ 佢… (不想讓人知道J離家出走) 佢… 佢未返喎，你邊位搵佢呀？ 哦，好丫，我幫你留低個message，佢返黎我幫你話佢知丫。 (想套消息) 呀… 係呢，其實我都有D擔心佢呀，佢由放學到而家都未返過屋企，你知唔知佢會去左邊呀？ …咦，乜佢冇返過學咩？ …係呀… 佢又冇同我講喎… 哦，係呀，你有個friend同你講話佢放學會去接阿J？ 個個係邊個黎架？ 哦… 叫阿恩呀… 咁… 麻煩你可唔可以俾佢個電話我呀？ 因為我都想搵阿J，問佢今晚返唔返黎食飯呀。 你等陣下… (拿紙和筆) 喂，你講丫， 416-293-8111。你個朋友叫阿恩係咪？ 好丫，唔該哂你先，阿J返到黎我叫佢俾電話你丫，唔該，bye bye。

(媽媽拿著電話號碼，開心又有點不知如何是好。)

(J家light off，餐廳light on。)

J：      

你話你地禮拜五就搵到我？ 但係點解你地星期日晚先打黎搵我既？

爸：   

因為你媽咪話，你星期日就要去比賽喇， 如果我地星期五就搵你，佢驚會影響到你比賽既心情。況且佢話過唔俾你參加比賽，如果佢真係捉左你返屋企既話咁你咪冇得去比賽囉… (看到J驚訝的表情) 唉… 你應該都知你媽咪係口硬心軟架啦… 冇錯佢係好唔贊成你去參加呢D比賽，但係如果你真係好想去既話，佢都唔會企到咁硬要阻止你。不過因為個日佢嬲你之前一直都瞞住佢，你又同佢頂嘴，佢咪發哂脾氣咁話唔俾你去囉。其實如果你一開始就同我地商量既話，乜你覺得我地會咁殘忍唔俾你去咩？

J：      

(羞愧但又不想認錯) 咁… 咁我點知你地會唔會唔俾我去喎… 媽咪佢連我去唱K都話得我一餐，如果我去參加呢D唱歌比賽，佢一定會鬧死我啦…

爸：   

你都冇同我地講過，你又點知我地會阻止你呢？ 更何況你唔信得過爹地咩？  我都唔係D咁專制既人黎架。(見J有點慚愧，也不再說下去) …其實你媽咪都唔係唔知你鍾意唱歌架。你諗下，你媽咪最唔鍾意嘈架喇，但係你平時係房開到個喇叭咁大聲，又跟埋佢唱，你媽咪都冇話你… 佢唔鍾意你去唱K都係驚你學壞者。重有你比賽個日，你媽咪坐定係個電視機前面唔肯郁添呀。每當你唱完一首歌佢都會拍手，當你羅到季軍個陣佢重感動到喊添。不過後尾就不停咁係度話個冠軍、亞軍都唔係好好，話你先應該羅冠軍喎…

(J不知所措，又慚愧，又感動，默不作聲。爸爸亦靜靜的觀察J的反應。最後爸爸先說話。)

爸：   

點呀，你而家肯返屋企未呀？ 我地都唔可以係餐廳坐成晚架喎。 (J仍然不語) 放心啦，我諗你媽咪擔氣都應該消左架喇。你返到去，最多都係俾佢話一兩句者，佢唔會再趕你出黎架喇。你返屋企，點都好過你而家成日係出面麻煩人地，又要我地擔心丫。黎啦，你同我一齊返屋企啦好冇？

(J緩緩的點頭)

爸：   

(舒一口氣) 咁咪好囉… 咁先乖家嘛… 你等陣，等我而家打電話返屋企話俾你媽咪聽先。(打電話)

(J家與餐廳light on，J家電話響)

媽：   

(緊張的拿起電話) 喂。

爸：   

喂，係我呀，我而家同阿J一齊，我地食完晚餐就返黎架喇。

媽：   

(開心，但又不敢表露) 哦，係呀… 阿J佢點呀？ 呢幾日佢有冇瘦到？ 你有冇問佢呢幾日佢過成點呀？

爸：   

佢呀… (看看J) 我又冇問佢D詳細情形喎。 不過佢而家都幾好丫，都重幾好胃口… 你要唔要同佢講丫？

媽：   

(慌忙拒絕) 唔好喇，唔好蹝電話費… 有咩你地返黎先再講啦。

爸：   

唔… 係呢，你駛唔駛我買D野返黎俾你食呀？ 呢間餐廳D野幾好食架。

媽：   

唔駛喇，我係屋企煮個麵食得架喇。你地食完野就快D返黎啦。

爸：   

好啦，bye bye。

(J家與餐廳light off。)