雲: |
(自言自語) 點解會咁架… 本黎諗住一死以謝罪家嘛,但係而家死又死唔去,又唔可以唔返學… 都唔知會唔會見到阿傑同阿C添架… 哎呀… 點算呀… 唉… 我累到阿傑唔見左個電話,又冇錢賠返俾佢喎… 佢一定唔會再理我啦… 唯一一個肯同我一齊打波既朋友,就咁就冇左喇… 等我之前重不斷苦練,以為可以令到佢對我改觀添… 而家冇希望lu… |
(傑進場,但看不到雲) |
|
雲: |
(緊張) 哎呀! 係阿傑呀!哎呀… 點算呀… 佢行緊過黎呢便添… 佢黑口黑面咁,一定係重嬲緊我啦… 要再同佢道歉先得喇… |
(阿傑看到雲) |
|
傑: |
(很大聲地) 喂,奧雲! |
雲: |
(嚇了一跳) 對… 對… 對… 對唔住呀! (90度鞠躬) |
傑: |
(被突如其來的舉動嚇呆) 下… 你做乜野呀? 無端端做咩講對唔住呀? 重要鞠埋躬添,我個樣都唔係咁惡者,唔會嚇成你咁下嘛? |
雲: |
唔係呀… 咁… 因為… (怕舊事重提會激怒傑) 我上次應承左去幫你看野,但係又冇去到喎… 跟住就搞到你唔見左個電話… 你個電話重要係新買架… 咁… 我又冇錢買過部賠番俾你… 所以… 對唔住呀! |
傑: |
哦… 原來你講緊我部電話… |
雲: |
我應承你丫,如果我再有機會幫你看野既話,我一定會好準時到,而且一定會好小心架… |
傑: |
哦… 好丫,不過呢… |
雲: |
如果咁都唔夠既,我可以免費幫你補習架。你咪講過你要搵人幫你補math 既,我math都唔算差架… |
傑: |
都好丫,不過… (雲又想說話) 你聽我講先啦… (有點難開口) 嘻嘻… 其實… 拿,講明先,你聽完之後唔好嬲喎… 其實呢,部電話我已經搵返喇。 原來個日我真係擺左個電話係locker囉,因為我諗住如果帶埋去打波既話會好易唔見… (看看雲的反應) 唔好意思呀,個日鬧得你咁勁… |
雲: |
(如釋重負) 你搵番個電話喇? 你講真架? 真係好呀! 我幾驚你會因為唔見左個電話就以後都唔同我做朋友呀… 而家你搵到個電話就好喇! |
傑: |
(被雲的反應弄得有點不好意思) 哈哈… 傻啦,我點會真係唔同你做friend先得架,係咪? (突然想起) 呀,係呀,我今日放學之後又約左人打波呀,你得唔得閑黎呀? |
雲: |
去看野? 好呀好呀,我今次唔會再令你失望架喇。 我陣間一放學就去gym個度搵你丫。 |
傑: |
(被雲弄得啼笑皆非) 哎呀,唔係呀,我今次係真係約你去打波呀。你上次咪講過你好鍾意打波既,咁我今次咪預埋你囉。一黎係多謝你成日都幫我個team 看野,二黎當係賠罪… 更何況我之前聽阿J講過話你呢排積極苦練,打波進步左好多,我都真係要見識下呀。 |
雲: |
(有一剎那的不知所措) 你… 你講真架? (受寵若驚) 你真係俾我同你地一齊打波? (見傑沒有欺騙自己的意思,興奮) 呀~! 你真係好人呀! 咁我因間駛唔駛換埋衫先黎呀? 我地係邊度等呀? |
傑: |
你放左學之後,三點鐘度係大門口等啦。唔駛換衫住架喇,我地今日會係一個人屋企打,可以去到個度先換衫。 |
雲: |
咁好丫,我陣間放學之後即刻到… 阿傑呀,真係多謝你俾呢個機會我呀… 我都唔知點報答你好。 |
傑: |
哎,傻啦你,多乜野謝者,男仔之家唔好咁肉麻啦。唉唔講喇,就黎上堂喇,陣間放學見啦… (突然想起) 呀,係呀,頭先你話幫我免費補習,係咪講真架? |
雲: |
如果你真係有需要既話,冇問題。 |
傑: |
奧雲你果然唔話得呀! 估唔到你雖然也母也母地,但係都咁有義氣,我真係冇睇錯人呀。咁好啦,陣間放學見啦。 (傑走) |
雲: |
真係好呀,阿傑終於肯俾我去佢個team度打波喇~ (深深的吸一口氣) 忽然間,覺得呢個世界靚左好多添,哈哈~ (看看錶) 下一堂係spare,不如去library做下功課先… 哎呀,下一堂再下一堂就可以去打波喇,真係好興奮呀~ |
(Light off) |
(一伏在書桌上,很痛苦的樣子) |
|
雲: |
咦, 阿C喎,過去同埋佢一齊坐先… (正欲行過去) 唔係喎,上個禮拜佢先岩岩發完我脾氣,叫我以後都唔好去搵佢。如果我而家過去叫佢,一定又俾佢鬧一餐… 唔係喇,都係遲D先再搵過佢喇。襯佢而家重未見到我,快D走先。 (正想轉身) 咦,點解阿C會僕左係張檯度既,佢個樣好似唔係好舒服咁喎… (行近一兩步,再看真一點) 嘩,佢面青口唇白咁既,好似唔多掂喎,去睇下佢做咩先。 (又停下) 但係我如果而家咁茂茂然行過去,會唔會俾佢鬧呢? 但係如果我唔理佢,陣間佢有D咩事咁點算呀… (考慮了一會) 哎,算啦,死就死啦。 |
(雲行到一身旁) |
|
雲: |
喂… (推一推一) 喂… 你冇事丫嘛? 你唔舒服呀? (看看周圍) Dora呢? |
一: |
(依舊伏在桌上) Dora佢今日病左冇返學… 我頭先lunch 個陣冇食野,而家胃痛呀… |
雲: |
冇食野? 你做咩唔食野呀? 你冇帶錢呀? 你個胃唔好,唔食野點得架… 我而家同你去買D野食好冇? 黎丫。 |
一: |
(抬起頭,本來想說多謝,但因看到是雲立即發怒) 乜原來係你呀,我唔駛你幫呀! 我唔駛你可憐我呀! |
雲: |
(意識到周圍的人正看著自己,壓低聲音) 你做咩呀? 唔好咁激動啦… 你係咪重嬲緊我? 你嬲我唔緊要呀,但係你都要顧住自己身體先得家嘛。 你再唔食D野既話,因間好易會痛到暈低架… |
一: |
我都叫左你唔駛理我咯! 我好憎你好憎你呀! 我唔想再見到你呀,你快D走呀! |
雲: |
噓… 你冷靜D先啦,你咁嘈,老師趕我地出去架喇… |
一: |
(發脾氣) 我唔鍾意你呀! 你走呀!(想推開雲) |
雲: |
(坐在一對面仔細地端詳著一,溫柔的對她說) 你個樣真係好病呀… 不如你遲D先嬲我,我買左野俾你食先啦好冇? 再係咁落去你真係會暈架… |
一: |
(有點冷靜下來,也因為痛得厲害) 但係… 但係… 又係你地上次話我成日搵你著數,成日蝦你既… 咁既然你係咁諗… 我都唔想再麻煩你啦… |
雲: |
唉… 上次係阿傑亂講之嘛,我都冇咁講過… 朋友之間我點會同你計較呢D野喎… 不過你都唔好話阿傑呀,你知佢架啦,乜都講一餐既… |
一: |
咁係咪即係話你從來都冇咁諗過呀? (雲點頭) 咁係咪即係我可以繼續叫你幫我買野食呀? (雲點頭,一開心) 小雲~ 你真係好人喇! (痛) 哎呀… 咁不如我地而家落去買野食咯,我個胃真係好痛呀… |
(一起身) |
|
雲: |
你得唔得呀? 駛唔駛我扶你呀? |
一: |
唔駛喇,不過你可唔可以幫我拎個袋呀,唔該哂。(想起) 呀,小雲你知唔知呀,頭先有一剎那我忽然覺得你好有男子氣概呀… |
雲: |
(不好意思) 下… 係呀… (傻笑) |
一: |
不過都係個一剎那咋喎,我仍然覺得你似女仔多D,哈哈。 |
雲: |
(苦笑) 哈… 是但啦… |
(邊行邊說) |
|
一: |
呀… 係呢, 你今日放學可唔可以黎幫我補math呀,聽日test喇,但係我一D都唔明呀… |
雲: |
今日放學? 唔得呀… 我約左阿傑去打波呀… |
一: |
(超級失望) 呀…… 但係聽日就test囉喎,你唔幫我,咁我點算呀… (看到雲很為難的樣子) 一係咁丫… 你幾時打完波呀? 我之後黎搵你丫… |
雲: |
咁呀…我諗大概五點幾六點度啦… 六點之後應該冇問題架喇。你想係邊度補呀? |
一: |
我屋企…? 唔得喎,今晚我媽咪約左人黎… 不如去你屋企丫,你爹地媽咪唔會介意架哦? |
雲: |
我爹地媽咪返左香港,所以都冇問題既… 但係你一個女仔去個男仔屋企,你D屋企人放心架喇? |
一: |
如果係其他男仔都唔會放心架… 不過去你屋企就冇乜所謂喇。 |
雲: |
你咁咩意思呀… |
一: |
即係話你人品好囉,你唔好咁多心先得架… 咁一言為定架喇喎,我今晚六點鐘黎度你屋企,你唔駛預我晚飯架喇,我會食埋飯先黎架。 |
雲: |
好啦好啦… 係喎,快D去買野食啦,你再唔食野真係暈架喇。 |
(Light off) |
(雲和傑邊喝水邊說話) |
|
傑: |
奧雲,你果然係隔別三日,刮眼相看喎。估唔到你而家打波勁左咁多! |
雲: |
你係指… 士別三日,刮目相看下嘛… 你過獎喇… 其實… 我應該多謝你咁睇得起我呀,俾我同你個team一齊打波… |
傑: |
唉,唔好咁講,大家兄弟黎家嘛… 講開又講,你頭先連過三人之後插花再射入個球真係好靚囉,再示範多次黎睇下。 |
雲: |
下… 真係要…? |
傑: |
係呀,快D啦。 (雲不想) 拿,係咪讚你兩句就囂先,而家唔識人啦。 |
雲: |
唔係唔係… 好啦… (雲起身示範,傑拍手喝采,雲不好意思) 嘻… 多謝… (門鐘響) 我去開門先。 |
(雲離開,傑自顧自喝水。不久,傳來一的聲音) |
|
一: |
小雲呀,你屋企真係好靚喎… 但係點解有陣汗臭味既? |
(一與雲出現,傑見到一,剛喝著的水差點噴出來) |
|
傑: |
咳… 咳咳咳… 點解你會黎架? |
雲: |
(擔心地) 阿傑,你冇事丫嘛? |
一: |
(看到傑,感到討厭) 點解你會係度架? (掩著鼻) 咦… 原來係你整到成間屋臭哂既… 好心你打完波就唔好去人地屋企啦… |
傑: |
喂,咁男仔打完波係咁架啦,又唔見你話下奧雲? 重有呀,你黎呢度做咩呀? 你唔好阻住奧雲幫我補習添呀。 |
一: |
補習? 你講咩呀? 小雲今日係幫我補習架! 小雲呵… |
雲: |
係,不過- |
傑: |
你唔好講笑啦,頭先打波個陣奧雲先同我講佢今日約左個friend黎佢屋企補math,問我有冇興趣一齊黎… (對雲) 你講個friend唔係佢下嘛? |
一: |
係我咁又點呀? 又冇人逼你黎既,你隨時可以走架。 (對雲) 小雲你有冇搞錯呀,點解要搵埋呢D人黎喎… |
雲: |
冇呀… 我見橫掂我都要幫你補習,我之前又話過會教阿傑math,咁我咪叫埋佢黎囉。 |
一: |
乜你咁架… 教人都冇D誠意…如果因間我俾呢D人拖慢哂D進度點算呀? |
傑: |
喂,你係咪咁講野呀? 你而家好我好多咩? 如果你成績係好既話,就唔駛奧雲教你啦。 |
雲: |
哎呀,你地唔好再拗喇… 我地不如一齊做D Review先啦。你地有冇帶書,紙同筆呀? |
(一拿出書和文具,傑坐在一旁,有點尷尬) |
|
傑: |
我唔知今日會補習,所以乜都冇帶黎呀… |
一: |
唉… D 人,黎補習又乜都唔帶… 呢D人有咩用丫… |
傑: |
喂,咁我之前真係唔知要補習丫嘛。 |
雲: |
(阻止快要吵架的二人) 唔緊要啦,阿C你同阿傑share住本書先啦… 你可唔可以借多支筆同紙俾佢呀? |
一: |
唔… (扁咀,看看雲又看看傑) 算喇,既然小雲叫到,我屈就下啦… (不情願地把書移過一點。傑因看不到,靠近了一些) 喂,你個身成陣汗味,唔好坐咁埋啦… |
傑: |
你估我想架,我睇唔到丫嘛。 |
一: |
麻煩… (再把書移過一些,扔了些紙筆給傑) |
雲: |
(看到一和傑預備好,也挨過去看書) 咁你地而家做… (翻書) 做呢題先啦。 (指一指書) 呢題睇落去唔係太難,你地應該可以做到既。如果你地唔識就問我啦。 |
一: |
(看一看) 嘩… 咁難架… 小雲,我唔識呀… |
傑: |
都未試過就話唔識,唔怪得之你乜都唔識啦。 |
一: |
你而家識做咩? 話人唔識話自己。 |
傑: |
我都唔知識唔識架,不過我點都會試下先… (開始做) |
一: |
(看著傑在計數,不想認輸) 哼,我就唔信會輸俾你。 (開始做功課) |
(過了一會) |
|
傑: |
點算呢,去到呢個step,一直計唔到添… 點解會咁架… 應該係咁計架喎… |
一: |
(好奇看看傑的答案,發現錯處) 你梗係計唔到啦,呢度唔應該咁架,個x應該掉過黎呢便家嘛。 |
傑: |
咦,係喎,咁唔小心都有既… 喂,唔該哂下。 |
一: |
嘻嘻,唔駛客氣,我都知你需要人教既。 |
傑: |
你唔好懶醒,因間下一題就要我教返你… |
一: |
睇下點… 小雲,我做好喇,個答案岩唔岩呀? |
雲: |
(仔細地看) 岩呀,你做得幾好丫。阿傑你點呀? (看看傑的答案) 你都做得岩。 咁好啦,而家做下一題。 (看書) 就呢題啦。 |
一: |
(看著題目) 呀… 又係咁難既… |
傑: |
哦,呢題我識,我記得我之前做過既,應該首先要搬哂D未知數過黎呢邊先既… (看到一不明白的樣子,移過一點自己的答案給她) 即係要咁先呀… |
一: |
哦! 原來係咁… 得喇得喇,我識做喇… 估唔到你個頭咁大,都唔係生哂草喎。 |
傑: |
喂,幫你你重係度寸我。 |
一: |
講下笑者… 我地不如鬥快做完呢題丫,123! (埋頭做數) |
傑: |
嘩乜你咁奸架!(也埋頭做數) |
(Light off/on) |
|
一: |
呀! 好倦呀! 做左咁多math,做到個頭都實哂… 小雲呀,我地重要做多幾多題先得架? |
雲: |
你地如果識哂既話咪唔駛再做囉… |
傑: |
得架喇,我地已經完全明白哂架喇。你教得咁好,我地點會唔識呢? |
雲: |
咁呀… 一係你地一齊做多題數,如果你地真係識既話,你地就可以走啦。 |
一: |
好呀好呀,咁你快D出條題目俾我地啦。 |
雲: |
唔… 就呢題啦。( (x-a)(x-b)(x-c)... (x-y)(x-z)=? à Project on the screen) |
一: |
下… 咁難既… 都唔明佢問乜… 小雲你點可以咁架,咁奸既… |
雲: |
話明最後一題,梗係要出難D架啦,如果唔係點考到你地呀? |
傑: |
是但啦,我就唔信我地做唔到。 (努力的想) 首先…係咪應該寫哂D未知數出黎先呀? |
雲: |
咁樣都得既,可以幫到你地諗既。 |
(傑即刻寫,一在旁看。PowerPoint project on screen) |
|
傑: |
而家寫哂出黎喇,但係之後又點呀? |
一: |
(x-a)(x-b)… (x-m)(x-n)… (x-w)(x-x)… (x-x)… (x-x)… (醒覺) 咦,(x-x) 咪即係等如0囉? 0乘所有野都係0… 個答案係0! |
傑: |
(有點不明白) 下… (再仔細想想,明白) 係喎! 奧雲,個答案係咪0呀? |
雲: |
(為他們兩個高興) 岩喇,你地真係叻! |
(一+傑興奮地high 5) |
|
一: |
真係好喇,聽日個test冇死喇~ (對傑) 阿Mr. Kit,原來你都蠢唔哂喎。 |
傑: |
哈哈,大家彼此彼此啦。 咁我地而家可以返屋企喇哦? (雲點頭,傑對一) 喂,你可唔可以順便車埋我呀? 我屋企隔呢度兩條大街架咋。 |
一: |
唔… 是但啦,見你今日都唔係咁衰,車埋你啦。小雲呀,咁我地走先喇。真係唔該哂你幫我地補習呀。聽日見啦。 |
(傑與一走。) |
|
(Light off) |
天枰貓身世 有感而發 天枰貓貓樣 貓貓狂想曲