ab ke ham bichhrey to shaayad kabhi khwaabon men milen
jis tarah sookhey huey phool kitaabon men milen

dhoond ujrey huey logon men wafaa ke moti
ye khazaaney tujhey mumkin hai kharaabon men milen

gham-e-duniyaa bhi gham-e-yaar men shaamil kar lo
nashaa barhtaa hai sharaaben jo sharaabon men milen

too Khuda hai na meraa ishq farishton jaisaa
donon insaan hain to kyoon itney hijaabon men milen

aaj ham daar pe kheenchey gaye jin baaton par
kyaa ajab kal wo zamaaney ko nisaabon men milen

ab na wo main, na wo too, na wo maazee hai 'faraz'
jaisey do shakhs tamannaa ke saraabon men milen