aankh se door na ho

- Ahmed 'Faraz'

aankh se door na ho dil se utar jaayegaa
waqt ka kyaa hai, guzartaa hai guzar jaayegaa

itnaa maanoos na ho khilwat-e-gham se apni
too kabhi khud ko bhi dekhegaa to dar jaayegaa

doobtey-doobtey kashtee ko uchhaalaa de doon
main naheen, koi to saahil pe utar jaayegaa

zindagi teri ataa hai to ye jaaney waalaa
teri bakhshish teri dehleez pe dhar jaayegaa

zabt laazim hai magar dukh qayaamat ka 'faraz'
zaalim ab ke bhi na royaa to mar jaayegaa