phir koi aaya dil-e-zaar! naheen koi naheen
raah-rau hoga, kaheen aur chalaa jaayega
dhal chukee raat, bikharne laga taaron ka ghubaar
larkharaane lage aivaanon men khvaabeeda charaagh
so gayee raasta tak-tak ke har ik raahguzar
ajnabi khaak ne dhundlaa diye qadmon ke suraagh
gul karo shama'en, barhaa do me-o-meena-o-ayaagh
apne be-khvaab kivaaron ko maqaffal kar lo
ab yahaan koi naheen, koi naheen aayega