yaad ki rahguzar

- Faiz Ahmed 'Faiz'

yaad ki rahguzar jis pe usee soorat se
muddaten beet gayeen hain tumhen chaltey-chaltey
khatm ho jaaye jo do-chaar qadam aur chalo
mor partaa hai jahaan dasht-e-faraamoshi ka
jis ke aagey na koi main hoon, na koi tum

saans thaamen hain nigaahen, ke na jaaney kis dam
tum palat aao, guzar jaao, ya mur kar dekho
garche vaaqif hain nigaahen, ke ye sab dhokaa hai
gar kaheen tum se hamaaghosh hui phir ye nazar
phoot niklegi vahaan aur koi rahguzar

doosri baat bhi jhooti hai ke dil jaanta hai
yaan koi dasht, koi mor, koi ghaat naheen
jis ke pardey men meraa maah-e-ravaan doob sakey
tum se chaltee rahey ye raah, yoon hi acchaa hai
tum ne mur kar bhi na dekhaa to koi baat naheen