na ganvaao navak-e-neemkash, dil-e-reza-reza ganvaa diyaa
jo bache hain sang samet lo, tan-e-daagh-daagh lutaa diyaa

mere chaaragar ko naveed ho, saf-e-dushmanaan ko khabar karo
wo jo qarz rakhtey they jaan par, wo hisaab aaj chukaa diyaa

karo kaj jabeen pe sar-e-kafan, mere qaatilon ko gumaan na ho
ke ghuroor-e-ishq ka baankpan, pas-e-marg ham ney bhulaa diyaa

udhar ek harf ke kashtani, yahann laakh uzr thaa guftani
jo kahaa to sun ke uraa diyaa, jo likhaa to parh ke mitaa diyaa

jo rukey to koh-e-giraan they ham, jo chaley to jaan se guzar gaye
rah-e-yaar ham ney qadam-qadam, tujhey yaadgaar banaa diyaa