UNHA XORNADA MEMORABLE
NO SALNÉS
Domingo Fontán xa ten un
monumento en Portadeconde (Portas)
Na data do 17 de abril
de 1988, fixo xustamente douscentos anos, de que en Portadeconde,
lugar da parroquia de Santa María de Portas, nacía un
neno, o cal andando o tempo sería o mellor xeógrafo
que tivo Galicia.
Facía tamén xustamente dous séculos, de que as
choivas e os temporais foran moi soados no País Galego. E velaí
que neste cabodano do nacemento de Domingo Fontán, volveu a
choiva a facer acto de presencia -aínda que non con tanta forza
e estragos coma entón, cando xustamente non era cobizosa a
súa compaña, precisamente no intre en que Portas inauguraba
o monumento ó seu fillo máis ilustre.
Pero aínda que pasado por auga, este domingo 17 de abril, quedará
para sempre presente nos centos de persoas tanto de Portas coma doutras
parroquias veciñas, que se deron cita en Portadeconde para
honrar coa súa presencia esta gloriosa efemérides tanto
para Galicia como para España.
As doce do mediodía,
ó tempo que a Banda de Música da Unión de Lantaño
interpretaba o Himno Galego, e os fogos comunicaban a toda a bisbarra
esta celebración, o novo veciño de San Andrés
de Caldas, Xavier Touceda, quen precisamente nesta data cumpría
os 23 anos, procedía moi emocionado á descuberta da
súa obra escultórica, que vén a ser unha unha
reproducción en granito do cadro de Esquivel, o pintor
que no seu día retratara a Fontán.
Presentes nesta celebración,
xunto coa primeira Autoridade Municipal, o Alcalde de Portas, Don
Xoán Manuel López, atopábanse diversos representantes
do mundo da Cultura, do Instituto Xeográfico, dos concellos
veciños, así coma os compoñentes que neste intre
forman a Comisión Xestora da "Asociación Cultural
DOMINGO FONTAN" de Portas, presidida por Don Aurelio Louro Buceta.
Os demais membros son Emilio Perez Hermida (Vicepresidente) e Agustin
Salgado Abalo (Secretario); Roberto Vazquez Souto (Tesoureiro), e
os vocais: Xose Collazo Porto; Hipolito Pallares, Xavier Lueiro, Manuel
Doeste e Andres Duro.
O profesor Don Xosé
Filgueira Valverde tivo ó seu cargo, a disertación encol
da figura e obra de Fontán, que aínda que curta debido
ás inclemencias climatolóxicas do día, non por
iso estivo falta de fondura e de interese:
"Penso neste día malo, neste día en que é
tan difícil andar por estes camiños da Nosa Terra, penso
en Fontán camiñando en días así por toda
Galicia, de aldea en aldea, de lugar en lugar, de parroquia en parroquia...
Anos e anos para facer o primeiro grande intento xeométrico
que se levou a cabo en España despois de que tivera investigado
a altura da Torre da Catedral, e que tivera sinalado as súas
bases xeométricas para o seu traballo.
Penso tamén naquel Fontán neno, que andaría por
aquí por estas corredoiras vosas de lugar en lugar, de pequeno,
camiñando á escola, onde un mestre con moi poucas letras
e ningunhas Matemáticas tiña que guiar os seus primeiros
estudios.
E penso nesta Terra a vosa, tan fermosa, neste Val do Salnés,
nesta terra de Portas, en Portadeconde, todos estes lugares e parroquias
teñen influído nel entón".
Así encomezaba o Sr. Filgueira Valverde o seu discurso encol
do autor da Carta Xeométrica de
Galicia. No pouco tempo que durou esta disertación, soubemos
dun Fontán que xa dende raparigo mostraba unha grande curiosidade
pola Ciencia. Con poucos anos o vemos en Noia, onde aprende idiomas
cos refuxiados franceses que non estaban de acordo coas ideas da Revolución.
Ós 14 anos conseguía o título de Bacharel, e
pouco despois xa o vemos estudiando Artes, Letras, Canons, Leis, deica
chegar a ser o primeiro Enxeñeiro Xeógrafo de España,
tocándolle dirixir a primeira Escola, a primeira formación
dunha Ciencia nova.
Acababa de cumprir Fontán os vinte anos, España pola
inoperancia de Carlos IV e do seu ministro Godoy vese envolta nunha
guerra sen cuartel contra o invencible Napoleón. Era a Guerra
chamada da Independencia. Anos despois -como nos comentaba o Sr. Filgueira
Valverde- Fontán lembraba nas Cortes o sacrificio que pasaron
os veciños de Portas. Das 190 casas que había, 130 foron
queimadas e arrasadas pola francesada, entre elas a de Fontán.
"Como aproveitou -sigue dicindo o ilustre conferenciante pontevedrés-
esas leccións do seu gran mestre XOSE RODRIGUEZ, co cal entra
a grande Ciencia da Investigación na Universidade de Santiago,
un home universal que chegou a dirixir en Rusia o Grande Observatorio
de San Petersburgo, como Fontán tiña que dirixir o Observatorio
de Madrid".
Fálanos de seguido da colaboración dos paisanos, e do
receo dos políticos. Das depuracións, expedientes e
cesantías que tivo que soportar polos constantes cambios de
réxime que se respiraba naqueles difíciles tempos.
Fontán Deputado. E aquí móstrase firme
no seu amor por Galicia. Alguén lle reprochou que sempre estaba
pedindo para súa Terra. Reproche que en Fontán era motivo
de orgullo. Galicia sempre por enriba de todo. Agora ben, ¿cómo
ían a comprender os de Madrid os problemas dunha Terra tan
remota e aínda máis descoñecida? Galicia precisaba
camiños, tiña falta dun ferrocarril, e por isto e por
moitas máis cousas, foi polo que denantes dezasete anos -¡qué
pronto se din! pateou Galicia na compaña dun burro, ata conseguir
facer esa marabillosa Carta Xeométrica que lle presentou a
Raíña Gobernadora. Alí estaban tódalas
vilas, lugares, parroquias, ríos, montes... Era a fisionomía
de Galicia; o Solar de Breogán era transportado así
á Capital de España, para que a súa problemática
fose mellor coñecida e máis pronto atendida e solucionada.
Xa no remate da súa intervención o profesor Filgueira
Valverde, falaba de Otero Pedrayo -un dos meirandes coñecedores
da obra de Fontán-, e da disertación que dera en Bos
Aires:
"Otero Pedrayo sempre falaba del. Tódolos días
ollaba para o Mapa de Fontán..., levou o Fontán con
moito receo das Aduanas a Bos Aires, para que lle servira de guieiro
nunha conferencia. Despregouno diante do público, e en lugar
de ter uns papeis, un guión, unhas notas, falou do Fontán
con tanto fervor, con tanto entusiasmo, con tanto agarimo, que ó
remate houbo a máis longa ovación que Otero Pedrayo
recibiu na súa vida. Unha ovación tamén para
Fontán. Pero sobre todo, ó remate unha velliña
subiu deica o estrado, achegouse ó Mapa de Fontán, e
bicou neste lugar de Portadeconde, onde hoxe tendes esa estatua del
coma un veciño máis voso, coma un exemplo para todos:
para os nenos, para os mozos, para os que guiades este Concello. Como
tamén é unha testemuña de gratitude que ten esta
vila, que teñen estas parroquias, estas xentes de Portas e
do Val do Salnés, e dos outros concellos lindeiros, cara este
persoeiro que é un dos grandes Homes de Galicia, e que ten
que ser sempre un guieiro e un exemplo para todos nós. Nada
máis. Moitas gracias".
Un caloroso e longo aplauso premiou estas verbas de Don Xosé
Filgueira Valverde, quen moi emocionado nos daba a súa impresión
desta histórica, aínda que mollada xornada:
"Para min é unha xornada de moita emoción, porque
eu dende fai moitísimos anos, polo menos dende fai sesenta
e catro anos-, téñome ocupado de Fontán. Despois
participei nos homenaxes que se lle renderon: O que fixo o Instituto
de Estudios Galegos; o do Museo de Pontevedra; na da Exposición
de Cartografía que se fixo en Santiago... Teño dado
conferencias sobre el, e agora teño a honra de que se publicase
nese volume fermoso do Instituto Xeográfico, a miña
pequena biografía de Fontán...".
Conversamos así mesmo con D. Ramón Lorenzo García,
Delegado en Galicia do Instituto Xeográfico Nacional:
"Eu penso que ten un gran significado esta data -comenta o
Sr. Lorenzo porque dalgunha maneira recupera e rescata a memoria histórica.
E dicir, desta maneira a xente de Portas demostra unha gran nobreza,
recuperando para os seus fillos a lume da antorcha da memoria a Domingo
Fontán, impedindo que esta lume quede apagada, e dalgunha maneira
transmitíndolle a obra dunha persoa que traballou tanto e tan
ben por Galicia e por toda España".
Síguenos comentando o Sr. Lorenzo García que "Fai
uns anos a obra de Domingo Fontán, desgraciadamente estaba
esquecida, dado que en Galicia existía unha cultura cartográfica
pobre. Hoxe penso que estamos nun momento de cambio profundo, e dende
algunha maneira entramos nunha valoración nova da obra de Domingo
Fontán. Esta Exposición de Cartografía contribúe
tamén a resaltar a súa obra, porque permite enmarcar
a obra de Fontán dentro dos mapas que se fixeron antes e despois.
Pero de tódolos xeitos, o que si é certo é que
o movemento, as ideas, a inquietude e o entusiasmo das xentes de Portas
están contribuíndo a que toda Galicia teña unha
idea máis clara da amplitude da obra de Fontán."
Pola súa banda, Don Xoán Manuel López, Alcalde
do Concello de Portas subliña que a data do 17 de Abril significa
"... un gran acontecemento, debido a que Fontán é
un home de aquí, de Portadeconde, sendo un gran exemplo para
as vindeiras xeracións e para as actuais".
"O Concello de Portas -sigue dicindo o Alcalde-, vai
a volcarse coas súas máximas posibilidades a seguir
este exemplo, a buscar actividades que leven algo de Domingo Fontán,
procurando asistir a tódalas exposicións do noso Cartógrafo,
intentando conseguir que vaia a maior xente posible, facilitándolle
algún medio de transporte si é preciso, e facendo todo
o que estea nas nosas mans".
Conseguimos así
mesmo a opinión do autor do monumento a Fontán, o mozo,
veciño de San Andrés de Caldas Xavier Touceda, alumno
da Escola de Canteiros de Poio. O traballo foi feito nun tempo récord.
Comezado o 29 de febreiro e rematado o mesmo día da inauguración.
Estas son as súas verbas a pouco de inaugurar o seu traballo:
Dende logo para min é un día moi emocionante, dado que
é a primeira obra que fago deste xeito. Coido que a pretensión
de todo artista é ver realizado o seu traballo cara os demais.
Tamén é certo que tiven que cinguirme a un modelo, ó
retrato de Fontán pintado por Esquivel, e aínda que
esto coarta a liberdade da creatividade dun autor, síntome
satisfeito por haber compracido a aqueles que en min depositaron a
súa confianza, neste caso o pobo de Portas.
Cinco anos leva Xavier traballando na Escola de Canteiros, ¿cál
é o futuro deste mozo de 23 anos no terreo cultural e artístico?
Agora vou seguir outra liña. Dedicareime a traballar cara unha
vindeira exposición, nun estilo persoal, propio, no cal dende
logo non encaixa o monumento que fixen de Fontán.
Estas foron as verbas do autor do monumento ó Cartógrafo
de Galicia, verbas como non, cinguidas pola emoción daquel
histórico e entrañable momento que, sen dúbida
estará sempre presente tanto en Xavier como en cantos tivemos
a ledicia de vivir esa fermosa xornada en Portadeconde.
Sexan de seguido as verbas do Presidente da Comisión Xestora,
Don Aurelio Louro Buceta, as que sirvan de remate a esta crónica.
A nosa primeira pregunta ía encamiñada a saber como
se formou esta comisión:
Esta comisión formo use a raíz da xuntanza dunhas persoas
co obxectivo de tratar de resaltar a figura de Fontán. Das
conversas mantidas entre nós, saíu a Comisión
Xestora desta Asociación. Foi legalizada polo Goberno Civil
de Pontevedra en xaneiro do presente ano.
Coméntanos o Sr. Louro Buceta de que "... neste momento
hai un entusiasmo, un optimismo total de que esta Asociación
se manteña firme na meta prevista, no referente a Fontán
e a Portas. Aínda que traballamos a nivel de comisión
xestora, intentamos face-las cousas o mellor posible, desexando que
a xunta directiva que no seu intre se elixa, siga sempre no camiño
previsto".
Unha das preocupacións dende o primeiro momento por parte tanto
do Presidente desta Asociación, coma dos demais membros que
integran a mesma, era de que os restos mortais de Fontán ou
ben fosen traídos para Portas ou para o Panteón de Galegos
Ilustres. Pois ben, no Diario Oficial de Galicia con data do 19 de
Abril, publicouse un anuncio do Consello da Cultura Galega no que
se indicaba a tramitación dun expediente para declarar galego
ilustre, con dereito a ser inhumado no Panteón de Galegos Ilustres,
ó xeógrafo, matemático e político Domingo
Fontán Rodríguez. En acatamento ó disposto no
artigo 10 do Estatuto do Panteón de Galegos Ilustres, ábrese
un período de alegacións que a tal efecto póidanse
formular ante o citado Concello. ¡Unha profunda ledicia tanto
nos veciños de Portas coma naqueles que de verdade senten a
Galicia! Domingo Fontán que coñeceu o País Galego
coma poucos, descansará prontamente á beira de Rosalía,
Brañas, Castelao, Cabanillas e Asorey. Alí recibirá
a homenaxe de tódolos galegos "bos e xenerosos".
Abril foi un mes vivido cara a obra de Fontán. Confiemos en
que a cousa non quede nunha celebración feita con maior ou
menor entusiasmo. O camiño dende logo non vai ser de rosas
polos que se propoñan loitar polos ancestros culturais desta
bisbarra, pero sen traballo e sen esforzo non ai nada.
¡Ánimo!
(Aurelio Louro Buceta - Revista
nº 0)